Il-Kor parrokkjali “Infahhru lil Marija” ilu mwaqqaf mill-1975 u kellu bħala l-ewwel surmast direttur tiegħu lil Patri Marcellin Scicluna O.Carm.  Wara Patri Marcellin daħal is-Sur Joe Flask u warajh is-Sur John Chetcuti.  Għal żmein twil il-kor għadda taħt it-tmexxija għaqlija u mimlija dedikazzjoni ta’ P.Mario Enriquez O.Carm li l-Mulej sejjaħlu għal għandu f’Ġunju 2006.  Is-Surmast Josef Bugeja kien is-suċċessur ta’ P.Mario imma kellu jieqaf mill-ħidma tiegħu wara sentejn u minfloku daħal is-Surmast Joseph Galea.  Fil-preżent il-Kor huwa mmexxi mis-Surmast Joseph Chircop u bhala organista ghandu lis-Sur Anthony Camilleri.

Il-kor huwa kompost minn 35 membru ta’ etajiet varji.  F’dawn l-ahhar 25 sena l-Kor ta sehmu f’diversi okkazjonijiet f’Parrocci oħrajn, waqt Festi Titulari kif ukoll f’Quddies Solenni. Deher l-ewwel darba fuq it-Television lokali fl-1986, u nstema’ fuq ir-radju RTK bosta drabi.  Barra minn hekk il-Kor ha sehem f’kunċerti u festivals tal-korijiet fosthom f’Ħal-Safi, l-Isla, San Alwiġi, f’Wied il-Għajn u l-Belt Valletta.

Il-Kor jiltaqa’ għall-kunċerti nhar ta’ Tlieta bejn is-7.00 u t-8.00 ta’ filgħaxija. F’dawn il-kunċerti l-kor mhux biss jipprepara għall-funzjonijiet li jkunu resqin iżda jipprepara ukoll għal xi okkażjonijiet speċjali tal-parroċċa u anki barra minnha.  Bosta drabi ta s-servizz tiegħu f’tiġijiet, primi messi, ordinazzjonijiet u bosta ċelebrazzjonijiet oħra kemm fil-parroċċa u anki f’postijiet oħra.
Bla dubju l-kor huwa mfaħħar għall-esekuzzjonijiet mill-isbaħ li jagħti fil-jiem tal-festa meta jkanta l-kompożizzjonjiet tas-Surmastrijiet Ronci, Amatucci u mhux l-inqas dawk ta’ P. Mario Enriquez.   Il-Kor għandu wkoll kumitat illi jieħu ħsieb li, barra li jgħin lid-Direttur fix-xoghol tieghu, jorganizza attivitajiet kulturali u ta’ divertiment għall-membri u ħbieb tagħhom.
Il-kumitat joħroġ fuljett ghall-membri tiegħu darba kull xahrejn fejn jitnizzlu l-impenji tal-Kor u jinghata taghrif ġenerali ieħor.

Mro Joseph Chircop
Surmast Ġdid għall-Kor Parrokkjali
Infaħħru lil Marija

Min hu s-Surmast Joseph Chircop
Joseph Chircop beda jistudja l-mużika fl-età ta’ 7 snin mal-banda l-Isle Adam tar-Rabat taħt Mro. Joe Galea u ħareġ idoqq fl-età ta’ 10 snin. Ta’ 13-ilsena kompla l-istudji tiegħu fl-Iskola tal-Mużika Johann Straus taħt Mro. Paul Busuttil.  Ta’ 18-il sena kompla l-istudji tiegħu taħt Mro. Paul Borg u fis-sena 2000 ġab id-diploma ATCL u fl-2003 ġab ukoll il-liċenzjat LTCL rispettivament.  Huwa studja t-teorija taħt Mro. Ronnie Debattista u Mro. Raymond Zammit.
Fl-2007 temm b’suċċess Degree fil-Mużika fl-Università ta’ Malta u r-Royal Northern College ġewwa Manchester fl-Ingilterra fejn studja l-Armonija taħt Dr. Dion Buhagiar u Profs. Joe Vella.  Studja wkoll  il-pjanu ma’ Dr. Fredrick Aquilina, l-istorja tal-mużika ma’ Mro. John Galea, d-Direzzjoni ma’ Mro. Michael Laus u t-Trumbetta ma’ Prof. John Miller u Mro. Murray Grieg.
F’Diċembru ta’ l-2008 temm b’success l-P.G.C.E. fl-Università ta’ Malta, u ġie mogħti l-warrant ta’ għalliem tal-mużika.
Huwa jdoqq regolarment ma’ l-Orkestra Filarmonika ta’ Malta u ġie mistieden kemm-il darba biex idoqq ma’ l-Orkestra tal-BBC.
Joseph ikkompona diversi marċi kif ukoll ikkompona Marcia iddedikata lil Mro. Joseph Galea f’għeluq l-20 sena tiegħu bħala Surmast tal-banda l-Isle Adam. F’Settembru 2005 ġie maħtur Assistant Surmast u għalliem tal-Mużika mas-Soċjeta Mużikali La Stella Levantina Banda Santa Marija ta’ H’Attard. Fid-19 ta’ Ġunju 2009 inhatar b’mod unanimu mill-Kumitat Eżekuttiv sabiex jokkupa l-kariga ta’ Surmast Direttur ta’ l-istess Socjetà.
Fl-20 ta’ Ottubru 2009 ġie maħtur Direttur tal-Kor Infaħħru lil Marija u Maestro Di Cappella tal-Parroċċa tal-Fgura.
Joseph jaħdem bħala għalliem tal-mużika fil-Kulleġġ St. Thomas Moore u l-Kulleġġ Dun Ġorġ Preca, kif ukoll visiting lecturer fl-Universita ta’ Malta.
Fil-preżent qed jipprepara biex jibda l-masters u qed jistudja d-direzzjoni taħt Mro. Joseph Sammut.

Is-Sur Tony Camilleri - Organista

KUMITAT:
Presidenti Onorarji:
Rev. P. Hermann Duncan O.Carm. Pirjol
Rev. P. Renald J.M. Lofreda O.Carm. S.T.L Kappillan

Direttur Spiritwali:
Rev. P. Renald J.M. Lofreda O.Carm. S.T.L Kappillan

Surmast Direttur:
Mro. Joseph Chircop ATCL, LTCL

Assistent Direttur:
Melanie Spiteri

Organista:
Tony Camilleri

President:
Bernardette Caruana

Segretarja:
Carmen Axisa

Kaxxiera:
Marion Grima

Arkivista: 
Maria Seychell

Membri:
Horace Cachia
Irene Dalli
Mary Debono
Grace Magro
Evelyn Vassallo

Tislima lil Parti Mario Enriquez O.Carm
Direttur tal-Kor Parrokkjali - “Infaħħru lil Marija”
mill-1990  sal-2006

Patri Mario Enriquez O.Carm ġie msejjaħ għal għand il-Mulej, nhar il-Ħamis, 22 ta’ Ġunju 2006.   P. Mario kien ilu Surmast Direttur, kif ukoll Direttur Spiritwali tal-kor għal sittax il-sena.  Barra d-direzzjoni tal-kor, P.Mario kellu talent kbir għal dik li hi kompożizzjoni ta’ mużika sagra, u huma ħafna l-quddies u kant liturġiku li ħarġu mill-pinna tiegħu.

Il-kor ‘Infaħħru lil Marija’ kien wisq għal qalbu u kien dejjem jaħseb u jara x’jista’ jgħallem lill-koristi tiegħu biex dejjem ikabbar ir-repertorju tal-kor.  Kellu dedikazzjoni u paċenzja kbira biex jgħallem biċċiet tal-mużika ġodda, jew li jkun kiteb hu stess, jew ta’ kompożituri oħra.  Kien iħeġġeġ lill-membri biex il-kor jieħu sehem f’kunċerti, f’diversi lokalitajiet f’Malta, u jaqsam t-talenti tiegħu ma’ korijiet oħra. Il-kunċerti li P.Mario kien ipprepara l-kor għalihom, ma kienux biss dawk ta’ kant sagru, imma ukoll kunċerti ta’ mużika kontemporanja.

L-umiltàu s-sempliċità ta’ P.Mario kienu l-ewwel li jolqtuk fih. Kien bniedem li dejjem ħadem fis-skiet u l-ħafna xogħol li kien jagħmel deher mat-telfa tiegħu.

Minn qalbna ngħidulu grazzi tal-paċenzja li ħa bina waqt il-kunċerti;  grazzi ta’ kemm għallimna nkantaw u nitolbu permezz tal-kant; grazzi tad-direzzjoni spiritwali li kien jagħtina minn żmien għal żmien. Fl-aħħar nett, ngħidulu grazzi tal-wirt mużikali li ħalla lill-poplu kollu tal-Fgura.

Non omnis moriar. It-tifkiriet tiegħek żgur li se jibqgħu jgħixu magħna għal dejjem!